جال مدير عام الدفاع المدني العميد ريمون خطّار على مراكز الدفاع المدني الإقليمية المنتشرة على طول الساحل اللبناني الشمالي انطلاقاً من طرابلس، مروراً بالبترون، جبيل، وصولاً إلى جونية.
وتأتي هذه الجولة في باكورة الجولات التي يقوم بها المدير العام على مراكز الدفاع المدني الإقليمية في كافة المناطق اللبنانية، عقب التطورات الأخيرة التي شهدتها المديرية العامة، بجهود معالي وزير الداخلية والبلديات القاضي بسام مولوي، لجهة تثبيت المتطوعين الفائزين بالمباراة المحصورة لرتبتي فرد ورتيب والذين بلغ عددهم ٢١٢٤ عنصراً.
وقد أعطى العميد خطار توجيهاته إلى عناصر الدفاع المدني والتي تتلخص في النقاط التالية :
“جيت لعندكن بعد ما انتهى التثبيت بصدور المرسوم ومباشرتكن العمل كموظفين : انا وعدت ووفيت.
اليوم بعد ما صرتو موظفين مثبتين لازم تنتبهوا منيح على الأمور التالية:
-الالتزام بالقوانين : يعني الحضور النظامي على مراكز العمل. (حالياً بسبب الظروف المالية والاقتصادية كل الأجهزة الأمنية عم تغض النظر عن عمل اضافي، ونحنا ذات الشي ما راح نمنعكن من عمل تاني لحدّ ما تتصحّح الرواتب بتصيرو مضطرين تتفرغوا للخدمة بالدفاع المدني… بس انتبهوا الأولوية بوقتكن دايماً للدفاع المدني)
-الانضباط وخاصة بالامتناع عن كتابة أو نشر أي آراء أو مطالبات متعلقة بالدفاع المدني بوسائل الإعلام أو التواصل الاجتماعي بدون اذن مسبق، وأي مخالفة بتعرض الموظف للعقوبات المسلكية.
-احترام التسلسل: يعني ما بقا فيكن تعملو وفود وتروحو عند المسؤولين السياسيين بدون اذن مسبق بينطلب قبل وبينشرح الهدف من الزيارة حتى آخد قرار بالموافقة اذا كانت الأسباب كافية.
-بالنسبة لرواتبكن، انا كنت حريص انو تعملو مباشرة عمل من أول يوم صدر مرسوم تثبيتكن بالجريدة الرسمية حتى تنحسب اعتباراً من مباشرتكن العمل، يعني كل التأخير بصرف رواتبكن راح تقبضوه بمفعول رجعي من يوم مباشرة العمل.
-اليوم نحنا بعزّ موسم الحرايق، المطلوب تكونوا بجهوزية كاملة للتحرك الفوري لنحاول نسيطر على الحرايق ببدايتها. وأكيد شفتو الحملة الاعلامية عبر شاشات LBCI و MTV وغيرها.
-أمر مهم كمان : لازم تعرفوا انو عملنا منصة لكل واحد منكن يدخل عليها ويختار 3 أماكن يلتحق بواحد منها بدون حاجة للشفاعات، ونحنا منلبي قدر الامكان طلباتكن.
– بيبقى انو نبهكن على موضوع الهبات: ممنوع تعملو حملات لتجيبوا هبات لأنو صارت متل الشحاده، ما فينا نشوّه صورة الدفاع المدني ولا صورتكن انتو. أكيد نحنا منرحّب بكل هبة شرط الالتزام بالقانون لجهة ورود كتاب من الواهبين للمديرية العامة لنحضّر مشروع مرسوم قبول الهبة، وبعدها بتستلمو الهبة. مع التأكيد انو الهبات المالية ممنوعة وبتعرّض يلي استلمها للعقوبة. بكل الأحوال رح تتبلغوا الأسبوع الجايي تعميم بهالخصوص. وراح تتبلغوا كمان العقوبات بحق يلي عم يقبلوا هبات خارج القانون.
